السلام عليكم ورحمة الله وبركاته   كنت من زمان أتمنى أروح معرض العرايس مو عشان اشتري بس  أحب اشوف  هالأشياء وأحب اشوف البنات اللي يتزوجون يجهزون وعروض الأزياء هي أحلى شي . بس ما كنت اتجرأ اطلب من الأهل يودوني لأنه بيسألوني السؤال الي أعرفه شو لج هناك ..فأطالع العروض بالتلفزيون . اليوم دعتني إحدى قريباتي للذهاب معها  طبعاً ما رفضت الدعوة لأني كنت من زمان أريد أسير وأتفرج ..للأسف ما لحقت على عرض أزياء لكن لحقت على عرض قص الشعر ..اللي يضحك في الموضوع إنه اللي يسون الشعر رجال واللي يصممون رجال واللي يقصون على الحريم رجاال والي يبيعون مجوهرات رجال هاهاهاهاهاوإكتشفت صراحة إني أنا بدوية في هالأمور  ومالي دخل يعني تميت أطالع في الكوش والفساتين والمجوهرات حسيت نفسي في عالم الأحلام .. يعني شعرت إنه في تفاصيل مالها لزمة في الزواج وكان في سؤال في بالي من زمان  هل الزواج بيكون ناقص إذا الكوشة مو موجودة لازم العروس تطلع كوشة ما ينفع تكون قاعدة على كرسي عادي هاهاهاهاأعرف إنه هذا مو عالمي بس  البنت من يوم هي صغيرة تحلم بهالفستان وهالكوشة لكن المبالغة في هالأشياء هوغباء . أعتقد البنات يركزون عتفاصيل أحس ممكن يمشون الحال بأي شي يركزون على الميك أب لازم يكون صح والصالة تكون على أعلى مستوى تفاصيل أشوفها تافهة بالنسبة لي .بس هذا لا يمنع إني أتطمش شوي وأشوف بنات جنسي كيف يفكرن ..ونحن نتمشى في كل ممر نشوف عارضة من هالعارضات لا بسة بدلة العرس البيضاء وتتمشى كأنها عروس حقيقية  بوم أشوف العارضات يكسرن خاطري لأني  أحسها مرخصة نفسها  لكل عين تطالعها مثل المانيكان يعني صج الحركة ما عجبتني ..ويمكن شعرت  بالأسى لأنه نحن الحريم صرنا في النهاية مانيكنات ينعرض عليها فساتين وميك أب كأنها وحدة بدون مشاعر ولا كرامة ..يمكن هم مايحسون بهالشي .بس انا ما أحب أشوف بنت أوحرمة تكون أداة لعرض المنتجات ..ويستغلون جمالها وجسدها وهي على بالها إنها تشتغل شي مهم وبيخليها في مصاف المشاهير … . طلعت من المعرض وأنا مبهورة كيف إنه التجهيز للأعراس وليلة وحدة بس تكسب ذهب .وهم مستغلين عبارة ليلة العمر عشان تمشي تجارتهم ..الشي الوحيد الي عجبني في المعرض الشيكولاته للحين طعمها ما فارق بالي حتى من كثر ما أحبها طالعني البايع وقالي بتحبوا الشيكولاته  قلنا أكيد من ما يحبها  ترى هو عارف إنه نقطة ضعف الحريم هي الشيكولاته اما  أنا فأسميها عشقي الي ما أقدر اتنازل عنه ..  الله يزوج العزابية ويجربون مخاسير الأعراس.