ويهج خير

كل ما عرفوني على أحد في شغلي من طاقم العاملين .. قالوا لهم الكلمة التالية تعينت بعد الزيادات الجديدة في الرواتب..فيقعدون يطالعون ويهي بتأمل وبابتسامة ما تفارق الثغر.. ويقولوا لي الكلمة اللي استانست عليها مووووووت:ويهج حلو وويهج خير..

ذكرتني هالكلمة بريال شيبة دخل علي مرة الصيدلية أيام التدريب والفقر  وكل ما طلب مني شي قال لي : يا وجه الخير .. بعدني أتذكر ملامحه .. الكلمة كانت جد عاجبتني..

سألتني شو رايج في الشغل .. قلت لها الحمدالله مرتااااحة رغم ألم القدمين اللي كاتمته في قلبي خخخخخ

بعد شوي أسمعهم يقولون ما شفتي شي..يقصدون فريق العمل .. رغم إن الجميع حسب اللي شفته في هاليومين متعاون وطيب وما شفت منهم إلا كل خير .. الكل يعاملني بلطف..حتى الرياييل يكلموني بأدب واحترام ..بعدني ما بديت أصرف جدامي ثلاث شهور عشان أثبت جدارتي وأتثبت .. وأستلم أول راتب حقيقي.. تدرون بعد الزيادة والحمدالله عليها وبما إني عزبا مو متزوجة مثل الباقيين .. حسيت بوهقة في سالفة الفلوس .. خاصة إني في قلبي أعتبر الفلوس ابتلاء ومفسدة للنفس النظيفة ..أنا لو قلت هالكلام جدام حد  صاحي .. بيقول عني مو شايفة خير.. بس جد هذا شعوري..من أين اكتسبه وفيما أنفقه ؟..هالحديث الشريف لخير الخلق اللهم صلي وسلم عليه في بالي ودايماً أقول مسكين اللي لهته الفلوس..بس أبداً ما ودي نفسي وروحي تغرق في الإستهلاك .. وهني هو الإبتلاء..الأهل لهم النصيب الأكبر ..من هالراتب.. والباقي راح نفكر شو ممكن نسوي فيه ..

عبادي البسيط .. سأل كم راتبي..

وانا أقوله بين اربعة آلاف و خمسة آلاف  عاد إنت خمن   وبعد الزيادة بيصير على حسب حسابات المهتمين بين الستة ألف وثمانية ألف..

دعواتكم يا أحلى أخوان سعيدة بتفاعلكم وحبكم ..سعادتي ما تنوصف بكلامكم اللي كل ما قريته أقول حد عنده كثر هالحب ومن ناس ما يعرفهم .. الله يحفظكم ..